Lembran a grave situación para os gandeiros,
cun incremento do 100% dos ataques entre 2015 e 2017
Santiago de Compostela, 20 de xuño. Este
mércores 20 de xuño membros do grupo O-Xan presentaron a todos os grupos do
Parlamento de Galicia o resultado de tres anos de reunións, intercambio de
información e diálogo construtivo entre gandeiros, organizacións ecoloxistas e asociacións
de cazadores para acadar unha visión xeral e unhas propostas definidas para a
xestión sustentable do lobo en Galicia.
A situación actual é grave, cun incremento do
100% no número de ataques ao gando en só dous anos, e compre tomar cartas no
asunto e traballar para reducir os ataques e a conflitividade.
Hai máis de ano e medio que O-Xan presentou
varias propostas á Consellería de Medio Ambiente que non foron atendidas e esta
segue a priorizar unicamente os pagos por danos cando estase demostrando que
non reduce o problema e incrementa os custes para a administración. Esta
estratexia xa se seguiu noutras comunidades cun claro fracaso a medio prazo.
Neste sentido, defenden que é necesario o
desenvolvemento completo do Plan de Xestión do Lobo en Galicia, pois as medidas
non poden quedar en pagar os danos (que van en aumento) e empregar remanentes
(se os hai) para pagar pastores eléctricos aos gandeiros.
UNITEGA é socio fundador de O-XAN
O número de ataques rexistrados do lobo ao
gando en Galicia duplicouse entre 2015 e 2017
O número de ataques do lobo ao gando
notificados á Xunta de Galicia duplicouse entre os anos 2015 e 2017, pasando de
618 avisos a 1203. O números de reses afectadas tamén aumentou dende as 1.258
animais aos 2.379 en 2017.
Os ataques denunciados duplícanse nas catro
provincias.
En canto ás especies, o 60% dos ataques
rexístranse a ovellas, seguido de vacas, cun 20%, mentres que o 10% dos animais
dos que se denunciaron ataques foron cabras e un 9% cabalos do monte. No que se
refire á tendencia, entre 2015 e 2017 duplicouse o número de ataques
denunciados a ovellas e vacas, e en menor medida a cabras e cabalos.
Tradicionalmente o cabalo de monte era a
principal fonte de alimento das mandas de lobos en Galicia, pero nos últimos
anos foi perdendo relevancia tanto debido aos baixos prezos da súa carne como á
substitución de pasteiros no monte por plantacións forestais. Está por
confirmar cun estudo se estes cambios están a provocar unha modificación na
alimentación do lobo, cun incremento de ataques a gando ovino e vacún.