Os colectivos que integran O-Xan, que representan a
máis de 30.000 interesados, solicitaron unha reunión coa Conselleira de Medio
Ambiente e Ordenación do Territorio, Beatriz Mato, para presentarse
oficialmente como grupo de opinión sobre a
xestión do lobo en Galicia, constituído co obxectivo de fomentar o diálogo para
minimizar a conflitividade social e favorecer os acordos a favor da
coexistencia entre o lobo e a sociedade galega, así como propoñer, debater e
estudar medidas para unha correcta xestión desta especie.
Ademais, desde O-Xan quérese coñecer de primeira man, o
alcance que se pretende dar este ano á revisión dos baremos das indemnizacións
por danos do lobo no gando para incrementar o importe que se lle paga aos
gandeiros; e que foi anunciado recentemente pola Directora Xeral de Patrimonio
Natural, así como as axudas á prevención de ataques, tan necesarias para a
redución da conflitividade.
Quérese solicitar tamén á
Consellería que se habilite un sistema de comunicación de ataques a cans
utilizados nas explotacións gandeiras, na actividade cinexética ou como animais
de compañía. A efectos de ter datos do alcance real deste tipo de danos que
tanta alarma social crean ultimamente nos medios de comunicación e nas redes
sociais.
Para finalizar, vai trasladar a
Beatriz Mato unha invitación para que o Grupo de opinión O-Xan conte tamén
entre os seus membros cun representante permanente da Dirección Xeral de
Patrimonio Natural, co obxectivo de que sexa participe dos diálogos e análises
que se fan nas reunións que periodicamente celebra O-Xan. O que sen dúbida sería
unha útil ferramenta para conseguir minimizar a conflitividade social e
avanzar nunha correcta xestión desta especie que forma parte do noso patrimonio
natural.
Máis información sobre O-Xan: