INFORMACIÓN AOS MEDIOS
A Xunta de Galicia traballa xa na revisión e actualización da normativa que regula a actividade cinexética anual na comunidade co fin de retomar o Plan de xestión do lobo e as medidas de control desta especie silvestre unha vez que se materialice a rebaixa do seu nivel de protección, que se fará efectiva coa exclusión das poboacións ao norte do río Douro do Listado de especies silvestres en réxime de protección especial (Lesrpe).
GALICIA TRABALLA XA NA REVISIÓN DA NORMATIVA QUE REGULA A ACTIVIDADE CINEXÉTICA ANUAL PARA RETOMAR O PLAN DE XESTIÓN DO LOBO EN CANTO SE MATERIALICE A REBAIXA DO SEU NIVEL DE PROTECCIÓN
- O Consello acorda analizar o contexto normativo autonómico unha vez que o Congreso dos Deputados aprobou varias emendas a un proxecto de lei polo que as poboacións do lobo ao norte do Douro abandonarán o Listado de especies silvestres en réxime de protección especial, devolvéndolle o status previo a 2021
- Os técnicos do Executivo galego avaliarán todos os datos dispoñibles co fin de adaptar os criterios de valoración da recorrencia dos danos causados ás explotación gandeiras á situación actual pois son os que servirán de referencia para a adopción das medidas de control previstas no plan de xestión
- O fin último é desenvolver accións que permitan garantir o equilibrio entre a conservación desta especie e os intereses do sector gandeiro galego podendo autorizarse esperas, batidas ou monterías en casos convenientemente xustificados
- A Administración autonómica prepárase así para un axuste normativo que porá fin a máis de tres anos nos que non se puideron realizar medidas de control por unha decisión unilateral e sen base científica do Goberno central
- Os datos dos que dispón a Comunidade mostran que o estado de conservación das poboacións do lobo é favorable e que os avisos e danos por ataques subiron de xeito considerable obrigando a elevar o orzamento de apoio ás explotacións afectadas
A Xunta de Galicia traballa xa na revisión e actualización da normativa que regula a actividade cinexética anual na comunidade co fin de retomar o Plan de xestión do lobo e as medidas de control desta especie silvestre unha vez que se materialice a rebaixa do seu nivel de protección, que se fará efectiva coa exclusión das poboacións ao norte do río Douro do Listado de especies silvestres en réxime de protección especial (Lesrpe).
O Consello analizou hoxe o acordo polo que se inicia a adaptación do marco normativo autonómico -a resolución que fixa as épocas hábiles de caza- unha vez que o Congreso dos Deputados aprobou a semana pasada varias emendas a un proxecto de lei estatal polas que as poboacións de lobo ao norte do Douro abandonarán o Lesrpe. Deste xeito, en canto esa lei estatal se publique no Boletín Oficial do Estado e entre en vigor, a especie recuperará o nivel de protección que tiña antes de setembro de 2021, devolvendo ás autonomías a potestade de adoptar medidas de xestión e control.
Neste sentido, a Xunta levaba tempo reclamando ao Goberno central a rebaixa do nivel de protección do lobo -dado que o estado de conservación das súas poboacións en Galicia é favorable- co fin de acadar un equilibrio entre a súa protección e os intereses do sector gandeiro galego. Nesta liña, agora os técnicos do Executivo autonómico analizarán todos os datos dispoñibles co fin de adaptar os criterios de valoración da recorrencia dos danos causados polo lobo á situación actual pois servirán de referencia para a adopción das medidas de control previstas no plan de xestión da especie, aprobado en 2009 e plenamente vixente.
Deste xeito, ao abeiro da normativa que regula a actividade cinexética anual e dese plan de xestión poderían autorizarse accións como esperas, batidas ou monterías en casos nos que se xustifiquen convenientemente eses danos recorrentes ás explotación gandeiras, medidas que contarían ademais cun rigoroso seguimento por parte da Administración galega co fin de garantir a preservación das poboacións.
O fin último é desenvolver actuacións que garantan a viabilidade desta especie silvestre no territorio galego mantendo unha poboación estable e compatibilizar a súa existencia cunha actividade económica -a gandeira- que sufriu importantes danos nos últimos anos como consecuencia da imposibilidade de adoptar medidas de control.
A Xunta traballa así para retomar o modelo de xestión vixente ata setembro de 2021, momento no que o Goberno central aprobou de xeito unilateral e sen aval científico a inclusión desta especie no Lesrpe. Esta situación mantívose desde entón malia que a Comisión Europea e o Convenio de Berna se mostraron favorables a rebaixar a protección do lobo ao entender que se atopa nun bo estado de conservación.
Situación da especie
Situación da especie
Neste sentido, a información que Galicia remitiu recentemente ao Executivo central de cara á elaboración do informe sexenal sobre as medidas desenvolvidas en cumprimento da Directiva Hábitats revela que o estado de conservación das poboacións de lobo no territorio galego é favorable, ao aumentar un 37% nos últimos 20 anos. Os últimos datos dispoñibles apuntan a que en Galicia hai 93 mandas e que a súa presenza está repartida por máis do 90% da superficie da comunidade.
A imposibilidade de adoptar medidas de control dificulta a convivencia do lobo co sector gandeiro, con moitas familias ao límite por non poder afrontar as perdas derivadas dos ataques desta especie silvestre. De feito, desde o ano 2021 -no que se incluíu o lobo ao norte do Douro no Lesrpe- os avisos por danos disparáronse preto dun 77% e as reses afectadas por ataques da especie aumentaron un 57% -cunha media de 10 animais atacados ao día-, dificultando a rendibilidade económica de moitas explotacións.
Esta situación provocou ademais que a Xunta tivese que facer un maior esforzó orzamentario tanto en axudas para paliar os danos causados polo lobo como na adopción de medidas de prevención. Neste sentido, o orzamento das achegas para compensar os ataques desta especie silvestre pasou de roldar os 350.000 euros de media antes de 2021 a superar os 900.000 euros no presente exercicio.
Consello da Xunta de Galicia do 24/03/2025
